Hambamu ini datang padoMu. Tuntunlah hambo ko mano poie. Hambo tesosek dijalan ini, dak tahu laie arah kombali. Sudilah Engkau mau peduli. HamboMu ingek, dak akan dapek hidup selamonyo, suatu saat pasti akan borakhir. HamboMu ini dak ponah tahu bilo waktu Sakaratul Maut datang menjomput. Ya Allah Hu Ya Rabbku, yang memogang jiwo dan porasaan hamboMu ini.
HamboMu sodar dan hibo, ku yang ponuh doso tak tepori di saat moniti hidup sondiri. Bobagai onak dan duri ditompuhi. Leno dibuai mimpi dak pasti. HamboMu damboan solaut limpah kasih bekokalan untuk toruihan siso kohidupan. HamboMu memohon padoMu ponuh pengharapan Ya Allah Hu Ya Rahman.
HamboMu takuik pojalanan kabush menyolubungi. Kabur dek pandangan tiado sori, tosungkur di lorong sopi. Ya Allah Hu Ya Rahim, doa hambo panjekan, monangih bodoa ponuh koinsafan, menyosali dosoku lakuan, mongharapan inilah sebona Taubat Nasuha...Ya Ilahi Ya Rabbi, hamboMu ini menujuMu. Jiwo rago hambo jadi belonggu, agar mondapek keredhoanMu, tujuan akhir jalan hidup hambo.
Ya Allah Hu Ya Hayyu, hambaMu malu seroto kecewo ngan doso yang hambo ponah lakuan. Borilah kekuatan pado hambo yang lomah yang kurang yang jahil ini, Ya Allah Hu Ya Qayyum. Mudah²an segalo doso hambaMu ini diampunan dan dapek kombali kepadoMu seredhonyo.
Aku memohon ampun Ya Allah, Maha Penerimo Taubat,
Aku memohon ampun Ya Allah daripado segalo doso,
Tambahan kepadoku ilmu yang beguno,
Borianlah aku amalan yang dimakbulan,
Kurniaan kepadoku rezoki melueh,
Terimolah taubat hambaMu ini taubat nasuha