Bamulo awal agamo mengonal Allah
Jo apo Allah dikona mo tigo pekaro
Petamo tahu akan tubuah
Kaduo tahu akan hati
Katigo tahu akan nyawo
Pabuah baginyo tubuah juo tigo
Petamo tubuah nan kasa
Kaduo tubuah nan aluih
Katigo tubuah nan batin
Maksud tubuah kapado hati
Maksud hati kapado nyawo
Maksud nyawo kapado Tuhan
Kok iyo menyombah Allah
Pabuah jalan menuju kehadirat Allah juo ompek pekaro
Petamo jalan syariat
Kaduo jalan tarikat
Katigo jalan hakikat
Kaompek jalan makrifat
Pogang syariat tubuah nan kasa
Bazikir deh “La Ilaha Illallah”
Pogang tarikat tubuah nan aluih
Bazikir deh “Allah Allah”
Pogang hakikat tubuah nan batin
Bazikir deh “Hu…Allah”
Pogang makrifat Tuhan Allah punyo pogang
Bazikir dek rasio Allah
Syariat jalan tubuah
Tahu ketiadaan tubuah kito, zahia jo batin
Zahianyo tubuah batinnyo anggoto
Tarikat jalan hati
Tampek bagantuang baik dan jahat, zahia jo batin
Zahianyo akal batinnyo pangona
Hakikat jalan nyawo
Pencari jalan kapado Allah,zahia jo batin
Zahianyo angin batinnyo Muhammad
Makrifat jalan rasio Tuhan Allah punyo pegang, zahia jo batin
Zahianyo Muhammad batinnyo Tuhan
Syariat kok mati dima kubuanyo?
Dapek bumi nan tak bapijak
Mati tarikat dima kubuanyo?
Dapek langik nan tak babintang
Mati hakikat dima kubuanyo?
Dapek angin nan tak behombuih
Mati makrifat dima kubuanyo?
Dapek dilawuik nan tak barombak
Mati syariat mati tabi’i namonyo
Mati tarikat mati maknawi namonyo
Mati hakikat mati suri namonyo
Mati makrifat mati hisi namonyo