Soal² hidup dan kohidupan kokal yang kito sobutan bolun abish. Kito dah diboritauan yang idup kobelakang itulah idup yang sebona eh. Segalo kosungguhan kito dalam kohidupan yang sodang kogiatan, impian kriatif dan segalo macam nikmat ni kito tujuan dalam umo yang pendek ni, dalam maso yang saketek ni, kito sanggup momikul boban bagaimano pun borek eh. Kito sanggup payah, ponek, lolah, sukar kerano ado yang kito harapan ioitu kohidupan yang sojati. Ilmu dan amalan, usoho dan kerojo hanyo alat untuk moncapai hidup yang akan datang.
Hidup dimulo apobilo napeh dah bronti. Ganjil eh kan bunyi eh... yang sebolun tu apo? Hidup di dunio khayalan. Hidup yang mengumpolan di antaro hilangnyo yang disukoi yang ndak disukoi. Hasilnyo tocapai apo yang dicinto. Kosucian, kito tak ponah hilang yang dicintoi. Ketonteraman, kesonangan, kobahagiaan. Itu yang dituju.
Hasilnyo dongan kohidupan yang domikian, nakdo khabar yang lain kito terimo meolainan khabar dari Tuhan, yang disampaian dari tangan petamo dari orang yang paling sempurno akhlak eh, paling lueh ilmunyo, paling bona kato eh, ioitu Nabi s.a.w dan nabi² yang dahulu dari bagindo. Sojak dari Nabi adam, Idris, Noh, Ibrahim, sampai kepado junjungan kito Muhammad s.a.w, nada eh samo, mengatoan hidup yang sokarang ni hidup bokhayal, hidup to tampi².
Tobukti hal tu dalam hati orang yang boriman. Sohinggo buleh dikatoan dari iman jadi monjadi koyakinan sohingga jiwo tadi lamo² pindah daripado bayangan kepado konyataan daripado khayal yang akan hilang. Daripado hidup yang fana kerano inginnyo pado hidup yang sojati kerano rindu eh kepado kekosoan yang mutlak. Korinduan itulah yang monimbulan nila pado hidup yang sokarang. Kerano kohidupan yang sokarang tontuan hidup yang akan datang. Oleh sobab itu, barangsapo yang musafir, monuju kepado kohidupan yang bahagio itu, dio ndak rasoan laie bagaimano pahitnyo jalan yang ditompuh.
Dio mengorbanan segalo tenago eh, momandang dongan segalo yang borek. Ngan cinto, ngan redho, ngan hati lapang, toruih juo bojalan. Iyo kdang² kerano ponek dio bronti tapi dio tau pojalanan ni bolun selosai. "Banyak² bronti, lamo² sampai jo", kato eh.
Orang yang ndak mandang ni, ndak sampai kopecayaan pado ini, adolah orang yang ndak ado kotenangan kohidupan. Dio lokeh putuih aso. Ado yo orang² filosofi "Hidup ini" kato eh "Yolah momintak kopuasan". Ado falsafah moden ngaku ado eh wujud. Sesudah wujud, nakdo laie. Sobab itu solaie sompek tiko ado wujud tiko ado tu ndak dilopehan. "Kerano setolah kito mati", kato eh, "Samo jo". Sorang filosofi tinggi, ulamak bosar, perompak, sorang yang nakdo apo² bilo kombali ko tanah jadi tanah. Dimakan ulek. Alasan eh, tiko Alexander Macedonia merayau dokek satu kawasan kubo, di sinan betomu dio ngan sorang filosofi Deoganese. Lalu ditanyo eh, "Tuan mengapo ekau kek sini?" Deoganese boritau, "Aku sodang menggali kubo. Sey nak tengok ado bezo eh tak antaro tulang ayah tuan ngan tulang orang² lain di siko, rupo eh nakdo bezo eh". Kerano kato falsafah memang enak membaco, Jadi orang² filosofi begini pocayo sesudah mati nakdo bezo eh laie. Tulang samo² putih, tanah samo² hancur, samo² dimakan ulek, habish pokaro.
Sehinggo disyairkan - 'Hidup itu ialah menurut kepuasan lazat. Segalo yang ado ini yang ponting pueh'. Makan pueh, minum pueh, besenggamo dllnyo. Pialo dari kematian menyamoan antaro orang pandai ngan orang bodoh. Orang² bodoh itu di bawah bumi samo kedudukannyo ngan orang² filosof. Kalu ekau ragu yo cubo tanyoan bumi tu, apo pekataannyo? Perkatoan bogini adolah timbul dari orang yang mualif yang menontang agamo, menontang akal. Porasaan sobogini dari akal gak tapi akal yang ponuh ngan nafsu. Bukan akal yang kombali kepado komurnian eh, kepado fitrah eh. Akal yang jauh daripado iman dan hikmah.
Cubolah, hey malang, ontahkah oleh kerano maut itu menyamoan yang saleh ngan yang taleh, yang alim ngan yang jahil. Oleh kerano itu dikatoan kito samosekali, orang dalam sampai ko tompek pehontian torakhir, di mano kesonangan orang tu? Apokah duduk ateh singahsano mahligai dongan koistirehatan, atau duduk dalam kocelakoan kosengsaroan atau memang bronti jo segalo sosuatu pabilo maut dah datang.
Kito dah tanyoan pado bumi dongan ronungan dan monungan. Memang di dalam bumi bokumpol segalo tubuh, badan², tulang², kasih dan iman bokumpol, nasab keturunan bokumpol, tetapi kalau mati sehinggo itu sajo, apo guno eh agamo ni semuo? Apo kito semuo akan mutuihan jo, abishan jo agamo. Orang mengatoan hapusan segalo agamo, kemudian dio buek agamo sendiri.
Seumpamo tiko tojadi sorangan bosar²an, dari Hitler monuju Rusia, hanyo dikit sajo Rusia kalah waktu Stalin masih hidup. Apo yang dibuek oleh orang² pongikut Stalin tiko tu? Mompesiapan kubo Lenin. Dilotakan tubuh Lenin tu dalam kerando kaco. Ko mano mau simpan? Kalau boto ikut akibat pondirian dio eh, apo guno dio di simpan? Fikiran bukan dari tubuh tu. Kita lihat bagaimano manusio itu radikal, atheis, rasional tapi ado maso eh fikirannyo tu beronti. Ado maso eh porasaan mondorong segalo sohinggo disimpanlah mayat Lenin tu dipoliharo baik². Sesudah aman baru dikombalian ko tompeknyo yang asli. Datang orang ziarah kepado eh. Padohal kalau ditanyo pado mereko, mereko akan katoan Leni sudah samo jo ngan perompak dll.
Jadi kalu kito nak tanyo bagaimano manusio sesudah mati eh? Ko mano kito nak tanyo? Orang bougamo joleh monjawab, "Kepado Tuhan. Kepado rasul²". Akan sopakatkah nabi² tu menogakan bohong dalam alam ni? Kito tanyo gak pado orang² yang mongalami raso kojiwaan yang mondalam, monjadi khalifatullah di muko bumi, dan tanyo gak pado orang² bepongalaman, pado Quran. Tanyo ilmu tanyo iman, Tanyo akal tanyo fitrah murni. Samo sokali itu saksi yang dapek diterimo. "Apakah telah menyangkal orang² yang berbuat jahat dalam alam ini, akan disamakan kedudukan mereka dengan orang yang beriman dan amal saleh, sama hidupnya dan sama matinya. Itulah satu perhitungan yang salah". Yang dapek menyangkal cumo orang yang bodoh. Atau orang yang mengikari firasat jiwo. Sobab itu sorang ahli fikir Eropah, Oswald Spengler mengatoan, "Orang yang bosorak mengatoan dio ndak pecayo akan adonyo hari kemudian tu, bercorak, bersorak kerano dio melawan raso dari hatinyo sondiri".
Pandang pado soal tu, tobahagi duo - Ado orang yang momandang (asyik) kopado sosuatu. Ado orang yang momandang pado sosuatu. Orang yang cumo momandang kepado sosuatu, monjadian kopado sosuatu semato objek, fikiran dan hatinyo lelamo pocah-bolah. Dio ndak dapek mongambil kosimpulan. Pandangannyo cumo dongan pancaindera. Nakdo pekdah padonyo. Kerano dio ndak dapek momilih yang petamo sampai yang setoruihnyo, nakdo nilai laie totapi orang yang momandang pado sosuatu, pandangannyo membawo dio monyoborang kepado ruponyo, hakikatnyo dan maksudnyo. Ini apo? Dari mano ko mano? Kerano dio momandang sosuatu di hadapannyo, monjalar fikirannyo kopado yang lain sobab dan akubek yang timbul daripadonyo itu. Sampai dio mongaji juo apo arti wujudnyo ini, apo hikmatnyo dan apo ilmu yang sompurno di dalam ini. Tambah lamo darjat pandangannyo pado sosuatu tu, dapek membawo dio membezoan mano yang sahih, mano yang bona, mano yang salah. Mano yang kokal mano yang fana. Dio momandang pado kulitnyo dan isinyo.
Misal eh, kalau orang momandang kepado sosuatu tobujur mayat, dio lihek itu tubuh akan dimasukan ko dalam kubo. Sosudah dalam kubo io akan cair nakdo apo² laie. Filosof masuk ko dalam cair hancur jadi tanah. Si bodoh masuk ko dalam tanah hancur monjadi tanah. Dio momandang itu. Nakdo ertinyo. Tapi kalau dio pandang pado sosuatu, dio lihek dio bawak pado diri dio sondiri. Bocorai nyawo dongan badan. Apakah erti popisahan itu. Suhrawardi, filosof dan ahli tasauf yang bosa mengatoan, "Badanku ini mengurung keadaan hakikatku yang sebenarnya. Aku terikat di dalamnya. Tapi apabila aku mati, ertinya perceraian hakikatku yang hidup dengan badanku yang akan jadi tanah. Aku tidak mengenal mati. Aku lihat lagi kehidupan terus". Disobutkan oleh Jalaludin Rumi di dalam pongajian tasaufnyo, sampai moncapai tingkat yang paling tinggi dan diperluehkan laie oleh Iqbal, 'Apabila manusia itu mati akan mencapai tingkat kesempurnaan paling tinggi'.
Sobagai penghabat koraguan kito, kobonaran hal tu, kito kono borani ngatoan, "Na'uzubillah", Muhammad bohong, Ibrahim bohong, Ishak bohong, Ismail bohong, Isa bohong, semuo nabi² yang mengatoan hal tu kito bohongkan. "Na'uzubillah!" Di sinilah ponting eh pongajian.
Kalau kito tau dunio ni adolah jalan, jambatan untuk monuju penyoborangan yang lueh, yang kokal, tontu kito akan sedioan boka. Kito ndak kokal di sini. Kito akan menoruihan pojalanan ko tompek yang lain. Tompek yang kokal. Tompek tinggal. Manusio dipanggil ko sinan, dan mesti sampai ko sinan dongan posiapan hidup sokarang ni mengojoan porintah Allah s.w.t, menghontian apo yang dilarang yang disampaian oleh nabi² dongan isyarah dongan bukti. Domikian barulah sampai manusio tadi kopado kotonteraman hati eh. Untuk itulah dio dijadian, untuk itulah dio dipersiapan. Pojalanan hidup duduk di sinan. Di sinan itu pasti. Pado hidup yang sokarang ni bolun pasti, Mompastian sikap kito sondiri bagaimano kito hadapi jalan ni. Itulah deh hakiakt dari kohidupan yang dikatoan tadi, yang di sevorang itu hidup yang sojati.
Haji Abdul Malik Karim Amrullah